اقولك ايه؟؟؟ اهدلء للرقيقة سهير القيسى

أقولك أيه ... ؟؟؟

وعشت سنين ...
وانا ف الغربه وحدانى
أشابطها ... تشابطنى
وتقتل فيا وجدانى
وحتى الحلم مش باحلم
بتدبح فيا أحلامى
وأيامى ...
بتسرق عمرى
واعرفها من التصاوير
دعكت الطرق ف المشاوير
عرفت البيضه والشقرا
قابلت القمحى والسمرا
مفيش مره
عجزت ف وصف أى حنين
لغاية شعرى مااتبدل
وعمرى عدى سكاتى
يادوب غفله
هاكون فوق سلم الخمسين
وشفتك انتى حبيتك
وجيت اوصف
لقيت الفكر متبعتر
ومش قادر على وصفك
عرفت ساعتها ان خلاص
مافيش ف الدنيا أوصافك
رموشك نبض شريا نى
عيونك
سهم ومعشعش
ف وجدانى
ويااااااااااااااااه
من بسمتك ليا
تاخدنى لسكه
مفروشه أمل وحنين
وااااااااه من نظرة اعنيكى
يدوب الفكر يتشخبط
يتوه العقل يتلخبط
وتتخبل ف باقى العمر
أى سنين
أكيد هاتقولى : مش ممكن ...!!!
ومش معقول ... !!!
وهاتهزى صوابع ايدك الخمسه
قصاد ودنك
وهاتقولى :
أكيد مجنون ..!
ومش هازعل
ولا يمكن ف يوم أخجل
لأنى ف مره حبيتك
وعشت معاكى ف الاحلام
وانتى دنيتى الحلوه
ف كل منام
أشوف صورتك
تبدل دمعتى فرحه
واصحى الصبح متفائل
لأنى كنت وياكى
أقولك ايه ... ؟؟؟!!!
مانيش قادر على فراقك
ولا قادر على قربك
ولا هاقدر
أبوح بحبى قدامك
عشان عارف
بأنك أعلى م النجمه
وأبعد حتى م الاحلام
وانا عمرى خلاص عدى
ومش قادر على الأوهام ...

اكرم عبد السميع
مصر
سوهاج
– البلينا – نجع مازن غرب